Mohsin Naqvi

Har ek zakhm ka chehra gulaab jesa hai
Magar yeh jaagta manzar bhi khawb jesa hai

Yeh talkh talkhh sa lehja, yeh tez tez si baat
Mizaaj-e-yaar ka aalam sharaab jesa hai

Bara taveel, neyhayet haseen, bohat mubhim
Mera sawaal tumhare jawaab jesa hai

Tu zindagi ke haqaayeq ki teh main yun na utar
Ke iss nadi ka bahaao chanaab jesa hai

Teri nazar hi nahin harf ashnaa warnaa
Har ek chehra yahan kitaab jesa hai

Chamak uthey to samandar, bujhey to rait ke leher
Mere khayal ka daryaa saraab jesa hai

Tere qareeb bhi reh kar na paa sakoon tujh ko
Tere khayal ka jalwaa hubaab jesa hai

 

 

 

Apne aap se phirtey hain beganey kyon
Sheher mein aakar log huye deewaney kyon

Hum ne kab maani thi baat zamaney ki
Aaj hamari baat zamana maaney kyon

Woh jungle ke phoolon per kyon marta hai
Us ko achey lagte hain veeraney kyon

Sachi baat se ghabraney ki aadat kya
Jhootey logon se apne yaraaney kyon

Halwat* mein jo aankh milatey darta ho
Mailey mein woh shakhss humain pehchaney kyon

Mohsin jab bhi chott neyi kha leta hoon
Dil ko yaad atey hain yaar puraney kyon

 

Tanhayi Mein Ajeeb Zamanay Ki Wafaa Dekhta Raha
Umer Bhar Apna Ghar Tanha Dekhta Raha

Kaheen Na Kaheen Tou Badal Hee Jaatay Hain Silsilay
Magar Mein Jahan Gaya Sehra Dekhta Raha

Jaanay Kiun Katraatay Hain Loog Mujhe Milne Se
Kal Shab Dair Talak Aaina Dekhta Raha

Paani Maangtay Maangtay Mere Hont Pathar Ho Gaye
Wo Shakhs Mashkeezah Lye Khada Dekhta Raha

Be-Gunaah Tha Phir Bhi Sir Jhukaaye Howay
Sitamgar Ki Sitam Ki Intehaa Dekhta Raha

Umer Bhar Mohabbat Ka Kuch Yun Sila Raha
Mein Ose Aur Wo Duniya Dekhta Raha

Kahuunga Khuda Se Yom-e-Hisaab Ko “Mohsin”
Ke Zamaana Meri Barbaadi Ka Tamaasha Dekhta Raha

 

 

 

Phira Hun Saaray Zamanay Mein Darbadar Kaisay
Mein Tere Baad Bhi Zinda Raha Magar Kaisay ?

Wo Jaanta Hai Ke Kuch Roz Wo Nahi Tha Tou Mein
Pukaarta Raha Os Ko Idhar Udhar Kaisay

Mein Jis Ke Hijr Mein Roya Hun Paaglon Ki Tarah
Wo Kal Mila Tou Hansa Mere Haal Per Kaisay

Azeez-Tar Thi Jisay Neend Shaam-e-Vasl Mein Bhi
Wo Tere Hijr Mein Jaaga Hai Umer Bhar Kaisay

Kahan Ki Dosti , Kaisa Firaaq , Kon “Mohsin” ?
Mein Khud Ko Bhool Gaya Tujh Ko Bhool Kar Kaisay